رئيس الجمهورية حظر التجول وبعد

رئيس الجمهورية حظر التجول وبعد

قعد عندي أمل لاخر لحظة أنو أصحاب القرار ياخذو قرارات صارمة وقوية تبث الطمأنينة في صفوف الشعب الي يعيش حالة رعب من كل الجهات رعب م المرض ورعب من أنو ميوفرش قوت يومه ورعب من المستكرشين وعديمي الضمير الي مصولو دمو ...

تمنيت يا سيادة الرئيس يكون خطابك على قد اماني وامال التوانسة الي انتخبوك رغم علمهم المسبق انك لست بالسياسي المحنك ولكن انتخبك لأنك نظيف وأنا م الناس الي انتخبتك فقط لأنك نظيف ولانك سمعت لوجايع الشباب وجايع الكبار والصغار الي هبطوا نهارت الانتخابات يرددو في شعارات الأمل والحرية والكرامة ..انتصرت لأنك راهنت عليهم ووعدتهم بتاريخ جديد الشعب وحده يكتب تفاصيله... وصدقوك وصدقتك ... أما اليوم سامحني بكل الحزن والالم الي نحس فيه نقلك احبطتني واحبطت شعبك ....مفهمتش ياخي القرارات الي باش تاخذوها هابطة م المريخ وتستحق دراسات معمقة ودكتوراه واستشارات دولية وقارية ومريخية مفهتش الحلول ساهلة واضحة ولو الدولة بامكانياتها الحالية متقدرش قول صارحنا وارمي الكورة عنا واحنا نعاونوك قول راني نحب نعمل ونحب تعاونوني على تنفيذ القرارات .. ماو قلت السلطة م الشعب والى  الشعب اي فين القرارات فين الاجراءات .. لا حياة لمن تنادي 

سيدي الرئيس لو كنت أنا رئيسة دولة هاو القرارات الي ممكن نتخذها :

1/ فرض حضر تجول لمدة خمسة عشرة يوم قابلة للتجديد لمنع انتشار الفيروس

2/ اعفاء المؤسسات الصغرى والمتوسطة من أداء الضرائب من شهر الي ثلاث أشهر بشرط دفع مرتبات موظفيهم طيلة مدة التوقف عن العمل 

3/الزام رجال الأعمال يالتبرع لفائدة الدولة مقابل تقديم اعفاءات جبائية 

4/ تجهيز القطاعات الحيوية بكل الادوات اللازمة للقيام بمهامهم على اكمل وجه 

5/اتخاذ اجراءات صارمة في حق المحتكرين ونشر العقوبات المتخذة في حقهم ليكونو عبرة لمن يعتبر 

6/ تزويد العائلات المعوزة في كامل تراب الجمهورية بالمؤونة طيلة فترة الحجر بالتعاون مع المجتمع المدني ورجال الاعمال

7/تشجيع المهندسين الشبان والطلبة للابتكار تطبيقات تساهم في اكتشاف العدوى مثل ما ماهو تم العمل به في الصين أو اي تطبيقة تساهم في تسهيل أيصال الخدمات ومنع التجمعات وهذا ما يحفز روح البحث والابتكار في صفوف شبابنا مع فتح باب التبرعات لدعم هذه المبادرات

8/اتخاذ اجراءات قانونية صارمة ضد كل من يخرق الحجر الصحي مع نشر الاجراءات المتخذة في حقهم لدى الراي العام

9/العمل على تشجيع المنتوج المحلى ومساعدة المعامل التونسية على مزيد الانتاج خاصة المصانع التي تعمل في المجال الطبي وذلك من خلال التخفيض في الاداءات بالنسبة لهذه الشركات 

10/التنسيق مع مختلف الوزرارات لنشر قيم الوعي والتضامن وبث روح المواطنة والايجابية خاصة وزارة الثقافة 

11/ اعطاء مساحات لمثقفينا من كتاب ومسرحيين وفنانين لأخذ دورهم الريادي في التوعية والتحسيس .  ...كتابنا مثلا تنجمو بالتنسيق مع التلفزة تعملو كل يوم ومضة لمدة دقيقة تقترحوا فيها كتاب جديد للمطالعة للاطفال أو للشباب 

هذي خواطر أو افكار تنجم تجي في فكر اي تونسي أما افكار تنجم تفرح كل تونسي افكار ترجع الثقة في دولتنا وفي ارواحنا ....

سيدي الرئيس نقلك انه  شمس الأمل باقية لن تغيب  واملي في اولاد تونس وشيبها وشبابها أكبر منك ومن ساستنا ومن   احباطي منكم الكل... ربي يسترنا ويحمي تونس⁩